組合回報82.5%，目前持有40% TSLA、30% ARKG及5% ARKW，前兩者都係來年主要的投資題材，後者就只是將GBTC(太高溢價)暫泊，其實我睇好區塊鏈應用多於虛疑貨幣。
水無常形，兵無常勢，投資最重要唔係渣乜渣物，而係賺錢，你賺錢渣垃圾都係叻仔，但唔賺錢話之你渣住舊金都係傻仔，投資世界好現實，成王敗寇，但基本上以最短時間賺到錢就係好投資。所以以上組合只建基於我建倉時的一種基礎想法而定，可能之後會變化，譬如ETF會變成個股更加銳化攻擊，雖然我經常都唔係太想努力，不過個性使然，懶都懶唔來。
關於GBTC轉ARKW其實ARKW本身都有好多區塊鏈概念，而且被喻為旗鑑的破壞性創新基金ARKK其實組合內並沒有GBTC，所以我認為BTC本身並唔係癲覆世界既事物，但背後區塊鏈技術絕對係，下年越來越多大型區塊鏈公司上巿，尤其在虛擬貨幣方面，所以都會係巿場中一個主題，而其實有些公司，譬如VISA INC.睇落去似廢老股，但其實結算網上加添好多虛擬與現實的結合，升級變成獨角獸，所以有興趣可以去看看。
話不多說，今年絕對跑輸比ARK系列，無論係唔係低倉位操作都好，有些事情都必須要檢討咁先會做得好，時機和下注方面還要多下苦功，至於選股方面，攻擊面實在太多太繁，以致知識層面追唔上，今年研究課程由電動車、自動駕駛、AI、生物制藥、基因工程、區塊鏈及無人機等等，每一個課題由基本原理至深入都彷如讀了幾個學位似的，我認為投資有時就算你羸唔到錢都好，只要有心去做研究智慧資本還是會有所增長的，除非你只是跟風亂炒一通就另作別論。
更多的心得歸納將會在1月1日寫給大家，也讓我有時間再想一想組合應該如何是好，年尾總有種離愁別緒，無錯，組合歸零可能一開始就會跌入負值，有一個大利潤係到可以放肆，看來又要收心養性先跑出成績。
