寫左成年文章，由最初好多得意事和心得，寫晒出來到而家幾乎都斷斷續續，有時要寫野其實都幾心累，好在大家唔嫌棄就好。
先講下今年講最重要的是判斷趨勢，你睇最近QS呢隻股就知，因為吹風蘋果造車就創出新高，呢個就係趨勢既威力，當然前提係公司本身夠堅，不過希望大家唔好誤會因為公司勁所以爆升，99%上升是因為趨勢，無勢你勁到亞馬遜咁都會變軟皮蛇。
講得太多應該點樣，今日就反轉講唔應該點樣，譬如你判別到趨勢但因為知識層面唔足夠，應該去避免跌入自己的不足而去發揚自己的長處，最近我加入20%的ARKG為之一例，其實我講左好耐要搵十倍回報好難，除了TESLA之外當數生物科技，但正正因為自己本身不是該方專才，加上生技界別本身繁花多樣，而且淘換速度相當高，因此即使我判別了趨勢乎合但最後選擇投入ETF較為妥當，有時知道自己不足之處去避免，咁其實就已經中少好多雷。
散戶輸錢絕大多數都同明知自己不可為而為之有關係，既然自己都無該方面專長，還是趁熱鬧一鼓腦熱咁投入其中，結果賺錢純屬運氣，輸錢卻是理所當然。
好多時做人和投資相同，知道自己唔可以去做就盡量唔好去做，避免去犯錯，唔錯就已經係羸左一半，然後盡管向自己有優勢的地方進發，咁成功機率就會大大增加。
最後，我唔係叫大家固步自封，應該趁自己對任何事物有熱情之際就盡可能去了解，挖掘知識，日子有功自然自己既能力範圍就會大大增加，機會就會與日俱增。
