講HKBN之前講下NETFLIX同LAM RESEARCH先,兩家公司業績對辨,NETFLIX訂閱數增長,自由現金流亦見轉為正數,不過管理層話預料隨著復巿人數會減少,全年展望仍為負現金流,不過相對上年度來講負少左,亦即係話如果人數持續咁增長,應該好大機會變成一隻現金牛,當然流媒體呢家野唔係咁易經營,情況有少少似時裝咁,只要當期設計有偏差或者對比其他公司比下去的時候,人流可以即時消失。
另外半導體上遊既LAM RESEARCH業績不錯,顯然需求並沒有受疫情多少影響,如果聯合TSMC一齊睇,咁大概都估到半導體產業過去一季和未來三季大約情況會係點,所以我都保持看好半導體類股。
講返HKBN,原來自己都記錯左中報既公佈日期,單純計HKBN本體經調節自由現金流(AFF)係差左少少,計及WTT和JOS,整體AFF大約係440M,派息增長至0.37元,執筆時股價升至13.5元,係香港今時今日政經環境及疫情之下有此業績算係咁。
細部上,唔計拼購WTT及JOS的情況下,企業客戶營收自然增長25%,住宅用戶營收增長1%,此等數據對1883,PCCW及HKT有正面參考件用。
比較關注既係債務,淨債務大約為98億,對比年化EBITDA約為4.2倍,相對AFF大約11倍,比半年前安全邊際高左,銀行貸款利率比上年高左10%左右,我估計係WTT和JOS本身既借貸成本有關,對於HKBN要走出一條好路,債務管理是比較重要的一環,我期望公司會在此一環節上做多一點,尤其重債會係2022年屆滿,如無意外係未來半年裏會多做信用展期和再融資,爭取係低息環境下降低借貸成本。
綜合而言,HKBN係屬於高槓桿型的電信基建服務類股,同1883、PCCW及HKT一樣,絕對係5G年代的受惠者,尤其本身和HKT幾乎獨頭壟斷左香港既光纖巿場,除了香港政經環境是一個受限因素外,我幾乎看不到什麼不利因素存在。