追求真價值投資之道

現金分享妙用

呢篇文章好似唔係好關香港人事,不過道理其實同月供差唔多,就係透過不斷用現金流入來換取現金流資產,透過時間來換取不錯的長期被動收入。

澳門人歷年派左咁多錢,其實香港人都曾經有派過,相對澳門來講少得多,重點來了,好多人一聽到話有錢收都提前發晒瘟咁去消費,但從來無人諗住將呢筆錢去做定期高息投資,由於現金分享計劃究竟係每年都有還是不知何年何月會暫停,所以想自己永遠都有現金分享其實可以自制。

假設由最初期將呢筆錢投入去例如領匯(現稱領展)或者香港電訊呢類REIT,收6厘股息,今時今日唔計資本利得淨係收息都唔止一萬蚊一年,計埋資本增值筆錢都好可觀,到呢個時候先拎仔仔(利息或股息)去消費,咁先係永恆的現金分享。

無現金分享就自制,例如話每個月如果許可的話,先從收入抽起某個金額或者百分比,投資於現金流型資產,唔好諗住去買高風險投資搏回報,通常要咁樣去儲錢既人都係無乜股票經驗,唔好貪心,買高息型穩定的投資就好,先關注現金流而不是股價升值因素,到你習慣了先再考慮如何兼顧兩者。

題外話,政府做現金分享計劃所產生的消費乘數效應遠高於派發的金額,因為消費者心理對於來自意外之財較疏爽,而且好多時出手消費心中默念有政府派錢唔驚,洗下洗下就唔止派個條數,所以呢類政策永遠唔會死錯人。

亦曾經有財經界人士寫過派錢咁少應該去買衍生工具以小博大,問題來了,如果咁易以少搏到大,我地亦都唔需要再寫文章再開直播再買股票咁費精神,投資與賭博從來是因為成功率的穩定性和回報率是否合理而定。

有需要就唔應該攞去投資而是去消費,但如果買無謂野錦上添花的話我情願拎去投資以備不時之需,至少對於我呢種窮人來講如是。


關於此作者

雪明

由2005年開始投資港股,到2012年轉戰美股,2013年轉戰實金,然後到目前為止根據局勢發展四處流浪的投資者。2006年開始從Yahoo Blog、Sina Blog、Blogger、雪球及Facebook斷斷續續分享投資心得。

加入留言

作者 雪明
追求真價值投資之道