追求真價值投資之道

2020年第13週結

本週組合將美股一分為二,一回調回買入港股,美股倉暫時為空倉,而港股倉一半現金,另外4成為1883及1成1310,基本上只會買進電訊類股票,你宅係屋企乜都唔用但唯獨唔上網唔得,比電或煤更重要。

標普日線圖如上,底部上升16%,距離頂部有33%空間,咁究竟係真轉勢定係純粹反彈,真係到呢一刻似是而非,好耐都無試過咁搖擺不定,明明建倉了卻又深感不妙,真係好難做決定。

看一看基本情況,首先知道全球無限放水,錢已不是錢,此為上升力量之一,簡稱焗賭,但另一方面疫情又主導了實體經際,實體經濟主宰了金融,有錢都無用,尤其週五連英國首相都奶埋野,我都沽出止蝕觀望。

2008年雖然金融層面爆煲,可是實體經濟依然有序運行,股價受影響,我親自到海港城和利園一帶作實地考察,感覺經濟並沒有止息,而股價受金融層面影響低殘,所以都毫無保留地大手買進。現在則有一個問題,一者港澳經濟活動和平常已有一定影響,何況遠在歐美等地,我只能透過不知真假的新聞去判斷,究竟實質經濟係點完全唔知,就單靠消息和股巿升跌去判斷買進,對我來說情況就如同進入賭場盲注買大小一樣,風險已無限放大。

移師回港,一者要為老婆做點財務安排,萬一自己有乜風吹草動佢都可以好快咁拎到錢用,生活在一段時間內都不會受影響,二者作為投資,我能感同身受地知道經濟活動還有一個什麼樣的程度可言,所以港股投資我還是老樣子價合則買,不會十五十六。

有一天在投資GROUP講到,KEY PERSON如果都中左COVID-19咁會點,雖知道職業經理人特色係美股上面扮演一個好重要既角色,正如之前講買AMZN或者TSLA,都係因為個CEO超卓,如果無啦啦中招,唔知個股價又會點反映,老實咁講句,智者千慮總有一失,那天在FB講可能轉勢,要壞消息唔跌唔使好消息都升就應該係轉勢,然而就那一晚BORIS中招,你話幾咁諷刺。

只能因此而承認,人類無論科技同財富幾厲害都好,係疫症面前都不能不屈服認真面對,而久經股場的我都要快速地不斷認錯,現在非單純經濟或者金融問題,而是對人類歷史充滿威脅的事件,一切分析都可能被不斷出現的黑天鵝絞殺。

現在唯一肯定的是,人類總需要電訊服務去上網,所以港股毫無置疑買進相關公司,至於美國,我都唔排隊可能作相同部署,不過股息要打稅就要認真諗一諗。

轉勢定未轉勢,上週聯儲放大水後,星期五英首相中招下跌為首,盤中2萬億救巿拉升後尾巿迅速下跌,咁樣來講其實都係一種相隨態勢,並未完美乎合壞消息唔跌,所以繼續觀察,唯一要考慮的是,放太多水銀紙真係會出問題,唔通要迫住買貨,焗買都真係要諗諗有乜好買。

關於此作者

雪明

由2005年開始投資港股,到2012年轉戰美股,2013年轉戰實金,然後到目前為止根據局勢發展四處流浪的投資者。2006年開始從Yahoo Blog、Sina Blog、Blogger、雪球及Facebook斷斷續續分享投資心得。

加入留言

作者 雪明
追求真價值投資之道