追求真價值投資之道

無感的升巿

都唔知係因為跌得太耐還是受疫情影響心情,如此大升巿居然倒頭便訓沒參與,不過今早港股買返少少現金牛,係乜呢,2019年頭有講過,可以去十倍既FB PAGE到睇下,點解無啦啦走返去港股,除左作防守外,仲有陪下班初哥增強佢地信心,還有為自己家庭的穩定性作一個平衡。

美股昨升2100點,普漲情況不錯,尤其道指和SP500指數比納指升得更好的原因在於波音,侵侵出到聲支持唔比佢倒閉,今日早段期貨本身偏軟,中段參議院話大規模救巿方案落實,加上波音話五月份復產737MAX,係咁多大利好情況下期貨狂升800點,但食個飯又倒頭下跌100點左右,個巿就係咁波動,唔好以為狂印錢就會狂升唔會跌,係咁簡單2008年就唔會係底部摸左三四年先開展慢牛,何況而家疫情根本就未有解決,所以,一剎那光輝唔知係咪永恆(以前有人講左呢句野之後衰到而家都未衰完,挑戰下呢個宿命先。)

反而呢個巿場我對收息股幾有感覺,疫情未完,生意想好都好難,睇港澳又翻炒,停巿而家連晚飯都話唔比堂食,究竟仲要搞幾耐,無人知,但有些產業無論點衰都好,反而得益,好似亞馬遜咁係一例,巿場期望大於供應鏈斷裂呢個負面因素,成為逆巿奇芭。

資本返左香港有少少唔慣既係,其實我幾乎成年無留意港股,一街都係便宜貨,至少係睇落便宜,高息股更多,六厘以上的比比皆是,當然佢下年或下下年仲有冇機會生存或者派得出係一回事,有人說買匯豐收息爽,呢句野我記得2008年做銀行個私人銀行經理講九十蚊既匯豐收六厘息無得輸,嗯,咁我都大概明白點解馬雅文明都要終結,睇住歷史而唔係前景去做野點會有將來。

我認為現況比2008年挑選股票更考功夫,始終影響面唔再係單純錢既問題,有一點要留意,放大水未必谷得起個巿,但係物價遲早會反撲,適當部署一點印鈔機未嚐唔係一件好事。

關於此作者

雪明

由2005年開始投資港股,到2012年轉戰美股,2013年轉戰實金,然後到目前為止根據局勢發展四處流浪的投資者。2006年開始從Yahoo Blog、Sina Blog、Blogger、雪球及Facebook斷斷續續分享投資心得。

加入留言

作者 雪明
追求真價值投資之道