追求真價值投資之道

現金流投資

知道勢未轉而去買股尤如自殺,但又知道零息加放水現金已經稀釋購買力,唔知幾時會反咬一口,所以買股又傻仔,唔買又唔知幾時會比現金隊一刀,所以經常說兩難。

有一種投資流我幾喜歡,現金流投資法,就係買入資產唔理佢升跌,只關注派息和未來的派息穩定度和增長力,似乎呢種投資法係呢個時候都幾啱咀型,當然大巿下跌對任何股票包括REIT類都會死,大家都驚嚟緊經濟收縮REIT既營運都會受影響,香港REIT類無得選擇,全部商業地產或廠房寫字樓,呢類REIT當然無乜好講亦無乜好睇,但有部份REIT係美國值得買入對沖現金風險。

點解要買REIT,能對抗現金眨值風險的就係有形資產,本來我選擇了黃金,可是油價大跌令通漲因此降溫,所以黃金都失效,然而總係要對沖呢個風險,唯有選擇REIT,一來抗現金眨值二來有現金流,咁有乜REIT係逆經濟周期和疫證期間可以免受沖擊呢。

你諗下,你唔出門係屋企,用乜野最多,就係網購和網遊等網絡活動,網購其實需要好多倉庫,現網絡遊戲或電景都要用數據,呢兩類既REIT其實可以考慮一下,不過都係個句,跌巿乜都要死,關注現金流,呢個係你既防守力,唔好全力進攻,我極盡都係放20%左右對沖而已。

講返大巿,尋日一開已經魂斷,及後拉升,一段時間我諗好多人都入左巿以為已經跌完,其實收巿跌突,阿媽係女人人人都知,香港時間道指拉升但恆指眨力,而後美指又告偏軟,大起大落,現在每日一二千點成常態,唔好認為升一千幾百就係轉勢,有排都未,唔好心急。

至於疫症,欣慰的是多國都封城,這是我先前提及轉勢的一個重要要點,我希望更多重要國家封城,咁樣疫症可以在三兩月之內有效緩解,今日疫苗都開始試驗,這是一個重要進程,希望有效。

關於此作者

雪明

由2005年開始投資港股,到2012年轉戰美股,2013年轉戰實金,然後到目前為止根據局勢發展四處流浪的投資者。2006年開始從Yahoo Blog、Sina Blog、Blogger、雪球及Facebook斷斷續續分享投資心得。

加入留言

作者 雪明
追求真價值投資之道