追求真價值投資之道

2020年第11週結

本週唔貼倉,無乜特別。

週五港股先探底後倒V收跌近三百,美股先升一千倒跌再尾盤急升近2000點,點解咁癲,係咪要轉勢定還是純粹投機平倉,接下來分析。

港股反彈明顯是投機性平倉,因為歐亞特地政府因應疫情影響巿場信心,為免過度波動下令禁止沽空,空軍技術性平倉買上,因而導致上升,應該係咁除非唔係。而美股盤前一千點亦是相同原因,但都係同一個理由,疫情沒有得到有效措施竭止,因此盤中倒跌,證明無論如何禁止放空或者為巿場注入資金,疫情未解唔使指意會轉勢。

為何尾盤強拉二千點,看看美國政府宣佈緊急狀況,加大檢測篩選,醫保保障及撥款應對疫情,禁止歐洲地區航班等因素,巿場認為美國政府唔再吊而郎當而是戰戰兢兢地面對疫症,不再只為了短期經濟表現而妄顧巿民安全,因此巿場投以信心一票拉升買進。

當然我唔排除有部份投機者是技術性平倉,預示緊急狀況下美政府有極高機率宣佈禁止沽空,但更多的是信心轉為正面的表象。因此我說有轉勢的苗頭了,如果美國政府認真應對,例如篩檢、治療及封城等控制措施的出台,歐洲除英國呢個日落帝國九唔搭八之外,其他無論財政和防疫都認真應對,諸如封城等措施都陸續出台,這是一個正面的訊號,我認為已經可以適當地買進,作防禦性倉位,以作進一部觀察。

要繼續留意確診人數,各國政府加碼措施(唔係放水),巿場對前面兩者的反應等等才可進一步確定是否已經轉勢,需要知道接下來確診人數會激增許多,因為終於肯作檢驗,等要治療要知道的都浮出水面,面對事實才能有轉機,如果政府的措施有用有效,而巿場因為確診人數激增而繼續恐慌,也許是好好的加碼機會。

頂,咁你條廢雪之前唔買而家倒升成10%先話轉勢咁鬼廢,咁其實咁講啦,之前我死都唔肯買的原因是各國政府都唔正視疫情當全世界傻仔,但巿場好多SMART MONEY係唔會理,呢種先係基本面分析,你唔出有效措施一味放水其實多餘,錢本身就大把,你諗下如果港澳係疫區,你有錢你都唔出街消費,情況等同如此,但封城停工之類雖然經濟停罷可是你知道捱一段小時間後就會有晴天,道理是一模一樣。

講多咁多唔知你地明唔明我想講乜,我週五入左10%老麥做防禦性措施,其實老麥係REIT係收租佬,而家巿場係乜狀況,勁低息勁多錢,同時間只係等疫症過百業待興,係呢種自己覺得有轉勢的可能性下,又唔十分確定,加上低息,買REIT類的公司比較好,可攻可守,守就至少係逆經濟期都有租可收,當然唔係領匯或者置富之類,呢種商場無乜抗逆性,美股有好多類別既REIT,好似EQIX咁你自己可以睇下價,幾乎無乜跌過咁滯,你宅係屋企都間接地要用到佢,諸如此類,諗下無人出街,有乜行業會受惠,再搵呢類型公司會需要到既REIT,基本上至少保證業務受影響無咁大先,股價就要睇巿場轉勢堅唔堅,而家有個苗頭咁解。

呢排出來出去都係實況戰鬥文章好少理論性和教學性文章,因為我認為呢種絕佳機會人生少有,出於私心情況下我想賺左錢先,再將心路和做法寫出來分享,經驗尚淺者可能睇唔明唔出奇,我FACEBOOK有FAN PAGE你地可以留言問或者直接私信,我都會回答的。

廢話都要講多句,我只係散戶一條,睇既野都未必一定係正確,尤其以上轉勢的見解,請自行思考及慎重行動,以免引致捐失。

題外話,麥當勞我都可能會沽出,換入其他REIT,但總持倉不會超過20%,作為第一注,如果趨勢係正確,我唔介意向上加碼,大致如此,祝各位身體健康。

關於此作者

雪明

由2005年開始投資港股,到2012年轉戰美股,2013年轉戰實金,然後到目前為止根據局勢發展四處流浪的投資者。2006年開始從Yahoo Blog、Sina Blog、Blogger、雪球及Facebook斷斷續續分享投資心得。

加入留言

作者 雪明
追求真價值投資之道