追求真價值投資之道

論TESLA配股

昨夜TSLA盤前急跌,除了MODEL X有螺絲出現問題要召回更換零件外,更證實為公開配股集資20億美元,一般人見到配股梗係第一時間諗住趁高派貨,而我地圍內人睇就知道是絕佳吸貨時機。

條款是,發行265萬股,集資20億美元,承銷為高盛與大摩,承銷商有權再添食多3億美元的股票,其中ELON MUSK和高管會認購1100萬元股票,其實就咁睇發行價大約係755元,配股集資用途為一般營運之用。

其實如果大股東有意抽水,應該早前炒高就行權大手賣出再低位買回,幹麼要咁咁多野同時又要自己掏錢出來認購股票,加上所得資金唔係入袋而係直接公司集資,我都唔明白巿場擔心乜野,對我而言755元呢個係ELON自己一個背書既信心位置,因此我也加大了投資倉位。

其實股巿不是比大家用來炒賣的,雖然實際上九成都係炒炒賣賣不明所以,所以每遇著呢種情況就會手騰腳震,加上大多數人炒股好多時被妖股迷惑,咁妖股配股又九成九都係為左比大股東套現又真,所以好好利用巿場的盲目就是了。

股票巿場係比企業融資的渠道,而企業融資又簡單劃分為債務和股權融資,視乎資金成本而定,發債集資就唔使驚比人攤薄股權分身家,壞處係資本結構改變抗逆性會低左,加上利息支出增加導致現金流減少,又或者係債務巿場冰封或息率太高。股權融資即IPO台配股之類,多數發生在好景時候,股票升到天花板咁高,所得直入庫房,攤薄效應少同時又無利息支出,唔怕擔心條數到期無錢還,壞處上面講左,長遠成功左比人分身家。

如果明白融資概念,咁就睇得明究竟一單IPO或者配股係咪抽水定真心為公司,前提最好睇返自己家公司和管理層係乜野人比較重要,好公司自然抽水機率更少,而為公司發展較多。前例就有王維基既香港電視配股,而家再到伊隆既特斯拉,我認為兩者都有異曲同工之妙,巧利用巿場來為公司爭取資本發展,所以我以真金白銀再投多一次票,我信ELON MUSK!

關於此作者

雪明

由2005年開始投資港股,到2012年轉戰美股,2013年轉戰實金,然後到目前為止根據局勢發展四處流浪的投資者。2006年開始從Yahoo Blog、Sina Blog、Blogger、雪球及Facebook斷斷續續分享投資心得。

加入留言

作者 雪明
追求真價值投資之道