入門第一課：儲蓄

任你投資想法、心法和手法幾高明都好，無錢無資本根本唔會成事，筆者在十多年前也是如此，想法和睇法都很多，可惜就是沒錢，很多人第一桶金不會是投資而來的，反而是最不起眼的儲蓄而來。

當你儲第一個一萬也許很難，現在可能容易一點，十萬可能是一個關口，如果薪金是兩萬元一個月，當你克制力比較好可以儲到四五成，那麼雖要十個月至一年去達成，然而新手投資多數正回報甚少，因此儲蓄反而會是資本增力的最大部份，例如當你有第一個五萬，你每月儲一萬其實增長力會是20%每月了，投資除非你非常了得，否則絕對不可能有儲蓄增長來得快。

所以新手第一課，我會鼓勵大家好好想方法去做儲蓄，用盡你所有方法，包括打工、創業或其他方法(唔好做犯法野)去累積第一個資本，至於係咪唔好理投資呢，我反而唔覺得要急於去投，在工作中學習營商管理手法，創業學習銷售和帳目管理等等知識，這些看似不起眼的學識對將來投資好大禆益，好好去學去感受，唔好怨人工低又要做到狗咁，打工絕對唔係你既目的，但係要達成目標好多時就係要忍一下。

情況許可之下先試下用少少錢去做投資或者創業，唔好一開始就求賺大錢，因為到而家為止我都唔保證自己賺到大錢，好多時我希望新手輸錢，感受一下投資逆風既心情，趁錢少輸一下，將來或者會有幫助。

所以無論如何，用你的一切辦法，好好儲錢，無呢一個台階，都唔使再諗下一步了。至於有些人節制力較差，或者可以選擇找你信得過的人幫你保管金錢，為自己設定好一個目標，每個月都要達到呢個目標才做其他無謂的事，或者最好當然唔好買無謂野就好。

又有人說，咁辛苦唔知為乜，嗯，筆者當年二十歲，身邊友好都好吃好喝好消費，唯獨我節儉非常，現在來看就喜歡做的事情都毫無考慮，因為我知道好容易就搵到，有資本有能力在投資上就其實輕瞄淡寫。說得太誇張可能你會認為係吹水，但係記住無第一步就唔好再諗落去，餐搵餐清就好好找一份更高人工既工作，或者乾脆打多一兩份工去完成呢個目標。

點解好多人注定平庸，又少數人能夠輕鬆寫意，其實只係你睇唔到佢地中間做左乜野咁解，我有今天都是勤與儉，他有他今天可能只因過去玩世不恭，無論點都好，第一桶金無其他好既路數，唯勤儉是岸，好好地想一想，設定好一個儲蓄目標，有幾樣野就不要慳，對自己健康有影響的以及學習，除了錢以外，這兩件事也是未來決勝的關鍵。

各位請加油，尤其剛畢業或者終於立定心意去做呢個事業的人，而對於收入水平有咁上下而且資本已經有返一二百萬的人來說，儲蓄所帶來的增長已經是影響力有限，或者已經無關痛癢，這時候必須靠投資去增值，要是這樣，我認為反而學懂去用錢，好好享受一下生活較好，投資則在下一篇文章講解。

題外話，我唔可以講無其他方法去快速創富，但成功既人可能少到搵唔到，失敗或者中伏既比比皆是，尤其話借錢做投資，碌卡去創富既，就唔好諗咁多，了解下無壞，信就祝你好運，成功就係咁老套，一步步行好就得。