膝痛101 – 退化性關節炎

退化人人都會。不進即退，你唔係發育緊其實已經慢慢退化。不過退化無乜可怕，如何面對才是重點。當中，痛症來說，退化性膝關節炎十分常見。以下會簡單介紹。

症狀發作通常有時節性，並可以跟天氣及日常活動掛上關係。

退化性膝關節炎症狀如下:

1. 朝早起身會僵硬(morning joint stiffness)；久靜又僵硬；活動多了後，感覺有改善；多了就更痛
2. 關節疼痛
3. 關節變大
4. 關節有摩擦聲 (e.g. clicking / cracking)
5. 下肢肌肉流失

退化性膝關節炎通常隨著年紀惡化，走動得多會疼痛，上落樓梯會疼痛，更可以有卡著無法伸直的感覺，又會有時突然無法發力(giving away)。基本上膝關節有痛，年紀有45-50歲以上，有morning stiffness，有clicking/ cracking sounds 及 giving away — 臨床上已初步判斷為退化性膝關節炎。有D人更會退化到O型腳，其實基本上已經可以早D排定期等開刀。香港公家排期你懂的，等得佢來你已經痛到一個點，無奈太多公家配套有問題，Primary Care 又近乎零。我個人其實期待地方健康中心落成，我都有D興趣做下 (又轉型 XD) ，不過好大機會好官僚，我依D人未必適合。

跟著好多人就會話年紀大，一定避免唔到無得搞。Sorry，身體是自己的，咁快認命就無人幫到你。痴肥人士或自己有自知之名有D肥，腳又雞腳咁瘦的，減肥增肌啦。10 個有退化性膝關節炎，7-8個有體重問題。什麼咁多年都係咁食，飲食習慣好難改；什麼n年都無做運動，細細我都唔做；什麼平時工作已經體力勞動，返到屋企已經死狗咁，要休息。絕大部份是借口，是時間管理做得唔好，恆心不足，是因為未夠痛所以唔夠動力(motivation)去改習慣。當然有小部份人士，因為荷爾蒙問題或情緒問題有困難，值得理解。不過人就是懶(我就是大懶人)，天性如此，七原罪之一，正常 — 但至少自己要有自知自明，有病唔好喊。

又有D老人家或者好多亞洲人越痛越不願運動，佢會覺得行已經係訓練，越行越痛，行得多會越傷。這種思維十分危險—訓練永遠都需要，問題係如何去訓練又身體接受到，慢慢練番上去。

(語言學上，當一個文化有越多詞語去形容一樣事或再細分，其實代表佢地越重視。亞洲人比較多詞語去形容痛，其實普遍亦比較怕痛。當然現代人無幾多個好似維京人咁唔怕痛吧! To Valhalla!!!!)

當然退化了就退化了，我無神力幫你逆齡。但其實要明白退化程度並不是唯一決定疼痛程度的因素。在我以言，重要性一般是 : [肌肉強度及控制 > 體重 > 心理健康 > 退化程度] 。但退化到一個點無物理上頂著關節，就變成 [退化程度 > 心理健康 > 肌肉強度及控制 > 體重] ，亦基本上需要開刀處理，換關節。換咗關節退化不再影響，然後需要良好的復康心態 — 勤而不過，基本上絕大部份病人都可以重新得到正常生活。講起做手術，不要忽視術前訓練(prehab)，都係練下力咁但對術後復康十分重要，可減少復康時間。

處理方法基本上就係練練練練練練…

不過適當地，不可過。平時少少痛，可以熱敷下；發作時就冰敷止痛。如何訓練就留比你地自己的物理治療師吧。基本上straight leg raise, knee clam, sit-to-stand，無乜特別都可以當係stage 1 exercises。進步咗再加強度同難度。

P.S. 大家有問題就問吧，無乜所謂。近期會較忙，但係都覆到大家。寫文就睇心情同靈感吧，有乜想我寫又可以提議。