追求真價值投資之道

極真懶人投資法

重要既野講明先,廢話就之後幾段唔想浪費時間自己SKIP,50%-80%好既ETF加上剩餘既倉位放現金或類現金,每年、半年或季度做一次平衡。

系統既想法係避免人性的貪婪與恐懼,試想一想自己高位會否成日想追貨或不斷破底又唔敢入巿,而且咁樣做之後仲要係輸大錢收場,如果係咁你繼續睇落去。

因為股票ETF同類現金多數係負相關性,即係升巿會一升一跌,反之亦然,然後長期來說股價比債增長得多,唔代表債唔會增長,慢少少咁解,股高減股加債,股跌減債加股,機械化完全避免人性的缺點。

加上唔至於一下ALL IN或者無貨係手心亂如麻想追貨,永遠有貨係手又有現金係手既狀況,肯定升跌都安心。當然前題係你自己要配一個岩你自己既比例,唔至於少貨到訓唔著或重貨到食驚風散。

難點在於你如何堅持落去,而且初期選擇ETF同類現金時既功夫,因為已經不涉及選人選公司既問題,理論上已經係易到無人有,簡而言之,搵一個你信得過,有前途又安心既國家主要指數ETF就搞掂。

會否保證一定賺錢,如果呢個世界有保證,咁保險公司就唔會存在,或者D保單賣到咁個樣啦,投資從來都係自己負責。

鬼唔知你阿媽係女人咩,事實此法已經年實證,而且回報並不差,正如班哲明葛拉罕及John Bogle都講過呢種方法,我只係站係呢堆前輩既肩頭上,外加自己一點見解,簡單化咁講出來罷了,無甚特別。

投資本來就應該簡單易行,有時複雜不一定好。

關於此作者

雪明

由2005年開始投資港股,到2012年轉戰美股,2013年轉戰實金,然後到目前為止根據局勢發展四處流浪的投資者。2006年開始從Yahoo Blog、Sina Blog、Blogger、雪球及Facebook斷斷續續分享投資心得。

加入留言

作者 雪明
追求真價值投資之道