追求真價值投資之道

雪明組合2021年第10週結

名義回報41.13%,實際回報30.92%,個實際回報其實係假設行權後按巿值入帳既情況,同埋其實回報係有水份,因為我先收未來錢,至於到期係點其實無人知,最WORST情況咪TSLA歸零,就係咁簡單。

經歷史一次大跌同回彈後似乎巿況喘定些少,等埋美聯儲會議展望個巿就會有眉目,怕加息其實都多舊魚,倒不如考慮一下經濟活動同擴張情況,全民施打疫苗同重啓經濟如箭在弦,如果經濟活動真係掂當咁其實就算加息都係暫時煞一煞車咁解,唔通話一加加你十厘息咩,係咁個巿又會蕭條,你揸住現金又係屈機,所以幾時都好點都留多少少現金係身,錢賺唔盡,找到內心平衡點非常重要。

而家似乎好多人開始見到期權既威力,但其實有好多人連期權係乜來都未知,基本如執行價、打和點及到期日都未搞清楚,更唔好講乜Long Short Call Put,呢D野咁基礎我真係無乜心機講,有興趣學真係自己上網搵,要討論就應該討論如何開,何時開同埋開乜更加有用,自問如果無興趣學基礎野就唔好搞咁多野,專心選好股坐係做基金法就夠。

其實期權會將損益留在表外,現金先收但風險會在到期後知曉,所以有機會你以為而家係賺緊錢其實係蝕到傻仔咁,因此必須時刻了解自己有冇開大左,有冇開錯方向,同埋期權其實可以平倉,有時方向岩左也可以獲利了解,其實同正股極度相似,SP係買入正股既替代操作,SC係沽出正股既替代操作,睇下自己點去運用。

其實世間萬物基礎為據,太多人知道劍法掌法拳法,但內功卻無人修練,就算比你打到個形出來,無實際根據出發始終一遇上高手就比人震散,投資、健康及運動都係一模一樣,了解基礎對自己整個架構有重要支撐作用。

關於此作者

雪明
雪明

由2005年開始投資港股,到2012年轉戰美股,2013年轉戰實金,然後到目前為止根據局勢發展四處流浪的投資者。2006年開始從Yahoo Blog、Sina Blog、Blogger、雪球及Facebook斷斷續續分享投資心得。

加入留言

雪明 作者 雪明
追求真價值投資之道