追求真價值投資之道

驚艷既牛肉麵

店名:
青藏牛肉麵
地區:
北角

係北角工作完,打算食埋晚餐回家。本來想食Five Guys,不過心諗我呢d鄉下新界仔黎到北角無理由食連鎖野吧。

問一問朋友,介紹左一條街俾我。呢條街非常隱蔽,唔識路既唔會無端端入到黎。去到附近咁啱Sarah姐又介紹左間牛肉麵,望一望個地址,又係呢條街。睇黎呢度真係識食之人先會知既地方。

去到牛肉麵門口,睇到menu有串燒,仲要係北方好多孜然粉嗰種,果斷入去。坐低叫左普通size牛肉麵,再加個串燒拼盤。

牛肉麵一上,見到好多芫荽。我唔係芫荽控,不過唔抗拒。我覺得好食既食物,係有樣睇的。呢一碗牛肉麵,就係好食嗰種。點解咁講呢?芫荽翠綠結實無爛無黑;牛肉似手切嗰種,有厚度唔係溶溶爛爛嗰d譚仔肉。

飲一啖個湯,驚艷,有藥材味,好有北方feel。d牛肉就不要太大期望,無咩特別牛味但已遠超預期,呢碗麵$42 超值。

到串燒拼盤,有5串,墨魚丸、芝士腸、雞肉、羊肉、翠肉瓜。上枱非常精神,滿滿都係孜然粉。一咬落去,爽!不過食多兩啖,就發覺d粉真係太多。串燒凍左少少後,出多左油,撈埋d粉變到直情係「孜然paste」,非常難頂。份翠肉瓜我要刮走嗰層paste先食得落。你望下我有張相個空碟上面嗰pat膏你就知,雖然已刮走左但我食完成晚個口都係得一種味。建議大家要少粉同埋唔好叫拼盤,直接嗌雞羊串、翠肉瓜同燒秋葵。

本來想食隔黎朋友介紹嗰間cafe,見到menu一個意粉百九幾蚊仲要未計加一,食唔起,就走左去食牛肉麵。估唔到,最後都非常開心地食左$110。

再一次證明,平貴無絕對,只有你覺得值唔值。而呢間,我經過絕對會再encore。

味道 (愈多星表示味道好):
環境 (愈多星表示環境好):
服務 (愈多星表示服務好):
價錢 (愈多星表示抵食):
上載照片(電腦可以按住CTRL選取多張圖):
上載照片2:
上載照片3:
上載照片4:
上載照片5:
附件遺失

關於此作者

加入留言

Avatar 作者 siuwa
追求真價值投資之道