尋找隱世漢堡包

今日想同大家介紹一間喺香港仔嘅小店 Cafe Whale!

第一次光顧係去年十月的時候，與友人行完山，來到香港仔想搵好嘢食。問了香港仔朋友有咩好介紹，佢就推介左呢間小店。

小店位於一個舊商場外圍地舖，第一次有啲難搵，行咗個商場一圈先搵到。間舖頭好細，得三張枱，疫情關係每張枱只可以坐兩個人。好彩我哋去嘅時候就有位，佢個Menu有好多款漢堡飽，除了傳統的芝士牛肉漢堡，都有唔同嘅特色漢堡包，例如，牛舌漢堡，炸龍躉魚漢堡，三文魚漢堡，飛魚子軟殼蟹漢堡。除咗有唔同嘅餡呢，佢有D漢堡包選用了竹炭包， 所以都幾有心思。

半年後今日，再行多次香港仔水塘後，梗係再黎呢度開餐，今次叫了蜜糖芥末三文魚，個三文魚扒非常驚艷，塊扒有4-5cm厚 ，但厚得來D肉仍然嫩滑，加上我最愛的honey mustard 同酸青瓜加沙律菜，每一口都令人幸福感滿滿。特別係行完山後，黎呢度食一個份量十足嘅burger，真係大滿足。同場加映，sweet potato fries 同佢地杯dirty coffee, 都係十分值得推介。

上次來的時候，還叫了一款叫地寶魚的炸薯條，個味道有D 特別，好local，即係咩味，咁你就要親身來試下啦。

佢還有不同款的漢堡飽，你地可以自己去開飯網看看，價錢來講，不算平，但食物有質素同創意，值得一試。唔想淨係入嚟食漢堡包，可以行埋香港仔水塘，咁就係一個好好的假日行程。