係講呢樣野之前，我想再簡單少少講一講趨勢投資最簡單既做法，有因素催使股票上升就買正股，當股票下跌時就唔應該持有任何股票，That’s All！
長期持有實在太根深蒂固以致好多時我地都會習慣性地去渣貨，就算隻野升升跌跌唔起唔跌都好都會習慣咁渣住，但問題係你渣住隻野既目的係乜呢，究其原因係賺錢，真係有誘因上升你渣住就肯定，無貨你都要去買，而牛皮或下跌情況你仲渣住D貨我確信腦袋肯定有問題，任何情況下，除了確定係上升趨勢中，否則不應該持有任何股票，儘管你認為呢隻係好股。
呢套All in or Nothing既理論係我本人既核心架構，如果自問沒有耐得住寂寞和敢於向上買進既心態特質，咁其實以下既內容你可以唔使再睇落去，因為以下既新架構係建立係呢一套基礎之上。
除了買賣正股，OPTION也要善加運用，目前我只會考慮SHORT SIDE，包括SHORT CALL及SHORT PUT，以下簡稱SC & SP。
當你認為看好時，有兩條路可以選擇，買入正股或買入SP，相反，看跌時應沽出正股或做SC，做OPTION就食權金，做正股就最實實在在唔需要多解釋。至於乜野係CALL及PUT，咁簡單既野自己上去GOOGLE或者YOUTUBE下，唔明睇到明為止。
承上所說，我睇好就一定直接買正股，唔好搞乜鬼SP，但去到一個峰值或者我認為適當獲利點時，我有兩個選擇，沽出正股獲利，或者唔沽正股而開個近價SC，如果股票繼續上，咁就會打中左SC既執行價被人執行而止賺，有人會話咁咪好傻仔，明明升緊無啦啦為左少少權金而無左之後既升幅，喂，哥仔姐仔，麻煩你睇清楚少少，我係講緊我認為想獲利，唔係貪權金呀。呢個方向唯一問題係，升唔到而大幅下跌時咁點算呀，當出現咁既情況，其實同正股一樣，快點沽出正股獲利，咁仲有個SC點呀，哎，都下跌啦即係一定唔會比人CALL啦，正股下跌個陣SC既價會下跌，呢個時候你平倉SC獲利咪得囉。
大家明唔明呢到，唔明唔好再望落去，好認真，上面CALL SIDE既方式係最直觀，咁都唔明其實PUT SIDE會有少少吃力，明先繼續。
又講下趨勢未發動時，我認為根本唔應該買股，又或者更加唔應該就咁SC，儘管SC係比人唔睇好個時用，我本人唔支持裸權咁玩，輸無限羸有限既野唔好搞我。而係唔睇好既情況我會做乜，當然係等待趨勢，趨勢一發動我就會大買特買正股，就像你曾經看過我操作那樣，呢到係無分別，但趨勢未發動我係咪乜都唔可以做呢，其實唔係，有時候我想買一隻股而又未到價，但股價又牛皮，咁我就會買一個SP，食住權金等運到，打唔中個執行價我淨袋權金收，打中左我本身係咪都諗住買入，仲便宜左何樂不為。缺點係乜，有人話SP買左之後急跌咁點算，喂你買正股急跌個陣又點算呢，我有權金做BUFFER而你無，我輸少過你喎，大家都止蝕既情況下，你好似慘過我，而另一面係如果個股價急升咁點，無貨係手蝕大章，哎，你真係咁諗咁我上面寫既野咪變廢話，參考返上升趨勢要做既野咪得囉，咁隻SP會點，堅係升買正股，正股價升會令SP既價急跌，呢個時候唔使我講你都應該識平倉SP獲利吧。
寫到呢到，其實個操作係個倉會比而家更多現金，幾本上長期會係SP操作代替正股持倉，不過題外話，譬如我目標係買300股TSLA咁計，我係唔會開足300股SP，我可能只會開100至200股，唔好貪心，同埋SP必須備有足夠現金接貨，又或者SC本身係有足夠正股比人CALL，我絕對唔支持人賭搏或者刀仔鋸大樹，OPTION同信用卡一樣，你用得當就係工具，不當就會變魔鬼。
